TVB組明星籃球精英隊，積極備戰大灣區比賽，促進體育交流。成員方面讀書時已經係校隊嘅劉穎璇TiffanyLam做隊長，而陳山聰JoelChan係領隊，仲有熱愛籃球何廣沛MatthewHo、周志康DanielChau、張馳豪AskaCheung、張振朗OwenCheung、羅天宇JoeyLaw、黎諾懿等，球隊呢日喺廣州正式成立，各人獲頒訂製球衣。
平日熱衷跑步嘅山聰喺台上有解釋點解突然跨界去征戰打波，全因為阿仔Jaco已學咗籃球一年多，而且仲得到獎項，被阿仔啟發，同時想喺阿仔面前樹立好榜樣。
何廣沛自稱最叻係搶籃板，落場比賽一定會為球員努力，再將射波機會交畀隊友，揚言得籃板得天下。作為隊長嘅Tiffany要帶領住一班粗獷男隊友上陣，好彩喺體能方面佢一啲都唔輸蝕，有信心引領大家出戰。張馳豪就話除咗打波之外，佢哋亦希望娛樂大家。
而天宇喺球場上就一向有微笑三分嘅花名，大家好奇佢點樣入3分波而得嚟稱號，黎諾懿就要求天宇即場示範點樣入波，結果姿勢爆笑。
講到要到內地作賽，大家好自然會諗起「港普之父」黎諾懿喺比賽時點樣同對手戓者球證溝通，不過諾懿就話一啲都唔擔心，對自己語言能力充滿信心。