陳瀅同蔡潔將喺澳門合體開騷，兩人現身記招，獲黎耀祥、黃宗澤、陳山聰、朱敏瀚同胡定欣拍片支持，阿瀅話當初知道要同Jacky開騷，怕自己應付唔嚟，加上兩人未曾合作過，又擔心會唔會意見不合，到距離開騷越嚟越近，佢嘅不安就變成期待。
Jacky起初擔心票價太高，但聽到主辦對兩人有信心後，反而集中精力去籌備一個精彩演出內容。兩位除咗配合枕邊話嘅主題，分享閨蜜之間嘅小秘密之外，當然唔少得載歌載舞，兩人開始練歌排舞，阿瀅仲預告舞蹈中有一首性感嘅慢歌。至於嘉賓方面，Jacky指兩人經已將流程排得滿滿，若果再加嘉賓就會被搶風頭。
阿瀅同Jacky咁靚女，身邊一定好多狂蜂浪蝶，而家仲係單身嘅阿瀅，仲承認自己喺愛情呢方面幾進取，若果遇到心儀對象，佢會主動少少，但絕對唔會向陌生人採取主動。
