黎瑞恩大女曾凱栭（Sheree）於2021年中學畢業後，轉去澳洲升學，小恩子不時飛往當地陪伴，從未缺席女兒重要時刻，今日開心喺社交平台曬出愛女大學畢業照，小恩子話見阿女Sheree戴四方帽喺台上面嗰一刻，感動到典禮未開始已經喊咗，心情非筆墨所能形容。
小恩子與愛女Sheree關係似閨密咁親密，Sheree自細熱愛唱歌跳舞，於2024年黎瑞恩演唱會上驚喜登場，母女合作跳唱展現默契，體驗做歌手演出後，感覺做歌手唔容易，並冇入行打算，而家完成人生第一個必須嘅考驗。
小恩子就開心分享喜悅，指阿女喺幾日前終於大學畢業喇👩🏻🎓，「由你幼稚園畢業到你大學畢業🎓我都從未缺席過🥳見到你戴四方帽喺台上面嗰一刻，我好似開水喉嘅眼淚😭心情真係非筆墨所能形容，恭喜你呀😃」。
小恩子話自己手機相簿充滿仔女成長嘅印記，廿幾年見證阿女由肚裏面嘅一粒豆，變成而家一齊傾心事、載佢去街，又提佢「Mom你咁樣唔得㗎」，長大後開始識照顧媽媽，一切令小恩子百般滋味在心頭，覺得好神奇，「雖然有時好勞氣，但係有98%都係開心嘅😉」。小恩子好感恩上天把呢對仔女賜畀佢，眼見仔女成長，亦放手畀仔女展翅高飛，希望仔女嘅人生自己話事，只要健康同快樂就夠喇！
小恩子於2002年與曾憲梓兒子曾智明結婚，結束7年愛情長跑，婚後退出樂壇，照顧女兒Sheree同兒子曾浩（Tyrone），專心相夫教子，甚少公開露面，小恩子2014年親證已離婚，獨力撫養子女，開始復出工作，並送仔女去澳洲求學。
