演員姜皓文（黑哥）主演跨國驚悚新片，集結香港、泰國、馬來西亞及新加坡演員陣容，被喻為一部集合各種降頭傳說嘅「降頭百科全書」式電影，日前於馬來西亞檳城及吉隆坡舉行發佈會同首映禮，並於上映翌日即宣告票房捷報，成為馬來西亞史上最快破百萬嘅本土中文降頭電影，電影喺馬來西亞，新加坡同步上映，台灣亦即將上映。
黑哥今次飾演降頭師，開拍電影前，跟劇組親訪泰國降頭師傅，認識降頭術種類、術語同解降方式，學習施法手勢及術語用於拍攝，降頭師傅坦言唔會教授佢真實手法，免得有唔好嘅事發生。 黑哥透過呢次學習認識降頭嘅故事，大家會偏向覺得降頭係一種令人毛骨悚然及害人嘅事，但降頭師傅表明好多時都係幫助人為主。
正如電影所講，降頭係一把雙刃劍，想要害人定幫人，當選擇傷人嗰陣，要考慮係咪傷到自己，呢個取決於一種心態而形成。降頭師傅透露只要有正能量及開朗嘅人比較唔容易中降頭，反而負能量及氣色低沉嘅人會比較容易中降頭。黑哥因飾演一名泰國華人，整部電影有大量泰文及國語對白，黑哥覺得壓力幾大︰「因為唔喺用母語廣東話演出，成部戲喺國語同泰文演出，拍攝之前要學習，最難學泰文，我要喺香港拍戲，要一直靠視像同泰文老師上堂。」
黑哥拍攝電影期間，感到身上有一種無形能量，給予佢好大信心，事緣於泰國見師傅時，師傅點名讓黑哥伸出手，將液體藥水倒喺佢手上，當藥水倒喺地上會產生黃色溶化氣泡，嚇得身邊人都勸阻，但佢心中感受到一種能量告訴黑哥對師傅有信心，自然把手畀師傅，藥水經過佢手時，只感受到一股暖流，十分奇妙。
《蠱降》故事圍繞一宗神秘「學生集體降頭事件」展開，泰國記者 Fon 為調查呢宗多年前嘅詭異案件，遇上四名前嚟泰國進行靈異探險嘅博主，然而四人回國後陸續被怪事纏身，當中一人更離奇死亡。Fon 懷疑佢哋遭人下降頭，於是搵白巫師協助解降，一步步逼近隱藏喺黑暗中嘅真相。
