奧斯卡導演李安籌備七年嘅新戲《金山》（Gold Mountain）傳出將於下個月正式開拍，最令人驚喜嘅係盛傳由章子怡同陳法拉出任雙女主，如果消息屬實，將會係李安同章子怡繼《臥虎藏龍》之後，相隔25年再合作。
據多間外國媒體報道，稱《金山》籌備工作已進入最後倒數，預計下個月將於加州正式開機。故事背景設定係美國淘金熱末期，講述兩名美籍華裔孤兒喺西部荒野中求生嘅血淚故事，呢類涉及「文化認同與情感糾葛」嘅題材，正正係李安嘅拿手強項。
章子怡當年憑李安執導嘅《臥虎藏龍》中玉嬌龍一角打響知名度，亦打開國際市場，令佢成功進軍荷李活，章子怡一直視李安為恩師，多次表示好希望有機會再同對方合作，今次相隔25年終於圓夢。
據知近日章子怡現身香港出席頒獎禮，身形豐腴唔少，就係為角色做準備。 另一位女主角陳法拉近年喺國際影壇穩步發展，因為演出漫威電影《尚氣與十環幫傳奇》令佢知名度進一步提升，近年喺國際影壇穩步發展，今次首度同李安以及章子怡合作，將會擦出咩火花令人期待。
