TVB全新節目《魔音女團》正式公佈16位練習生名單，但魔音形象深入民心嘅郭柏妍就竟然榜上無名，唔止觀眾覺得意外，連Rosita都覺得有啲可惜，呢日佢同黃庭鋒、胡敏芝一齊出席創意產業頒獎典禮，代表劇集《麻雀樂團》領獎，就有分享落選心情。
myTV SUPER睇《麻雀樂團》
Rosita同胡敏芝參加面試，雙雙落選，Rosita話：「本身都有為面試做準備，好緊張要跳舞又要唱歌，直頭瞓唔到覺，又生痱滋。」佢話緊張程度更勝當年選港姐，講完仲問胡敏芝認唔認同，估唔到胡敏芝秒答：「我都冇選過港姐。」Rosita先知自己擺烏龍，非常搞笑。
同樣有份出席頒獎禮嘅仲有代表《女神配對計劃》嘅曾展望、葉蒨文同梁敏巧，以及得到音樂同年度人物兩個獎項嘅張與辰。與辰話獎項會督促自己繼續發揮創意，挑戰跨領域工作，而下一步就係要進軍飲食業，「因為我實在太鍾意食了，同埋我自己都識得煮，想睇吓可以喺飲食業度玩出啲咩新花樣」。
myTV SUPER重溫《女神配對計劃》
《女神配對計劃》掀起全城熱話，大家等緊幾時會有第二季，雖然冇份再報名，Maggie自薦做三姑六婆親友團，GM就話建議新一季求愛男士要好似自己一樣，攞出一片丹心，自然可以打動女神芳心。
