《中年好聲音4》黑白榮耀換位賽來到第二周，繼續有五位下弦白隊同五位上弦黑隊選手出賽，爭取晉級下一輪賽事，今個星期最受矚目嘅一定係有兩位藝人劉佩玥同莫家淦登場。
阿Moon演戲實力有目共睹，今次放低藝人光環參加《中聲4》，坦言每次上台唱歌都非常緊張，而佢嘅努力，連導師Calvin Sir都高度肯定。阿Moon話知道自己有好多不足，勝在面皮夠厚，所以就算驚都會勇於嘗試。
莫家淦今次揀咗首《命運符號》出戰，見佢唱得好投入，原來首歌好能夠代表佢入行20年嘅心聲，當初做娛樂記者入行嘅佢，因為工作好辛苦，曾經諗過要放棄：「不過我啲同學都好羨慕我有機會喺電視台返工，不如堅持吓，一堅持就係20年。」
上個星期嘅比賽下弦白隊五位選手全部挑戰失敗，今個星期白隊加強火力，希望可以成功換位，科亞高巴再次挑戰唱廣東歌，揀咗張學友嘅《每天愛你多一些》，朱珠同樣揀唱張學友嘅金曲《祇有你不知道》。不過黑隊實力唔係咁容易可以打敗，陳旭培、尤淑情、蔡宓婕等個個都係五燈選手，絕對係一場硬仗。
