衛蘭 嘅世界巡迴演唱會去年展開後，已分別喺廣州、深圳、肇慶、東莞、成都、南寧、佛山、上海、廈門、湛江、汕頭等地舉行，亦曾到馬來西亞雲頂同加拿大多倫多演出，上星期Janice又將演唱帶到澳門，12000張門票閃電售罄。
Janice邀請 馮允謙 擔任澳門站嘉賓，Jay以一樽印有兩人合照嘅蜜糖作禮物：「知道你巡迴演唱會要好好保護把聲，蜜糖就最啱，希望你食蜜糖時望住張相，呢張合照係2021年我哋合作嘅一個騷，到而家仍然係我one of my favorite show。」
Jay又大讚Janice係非常sweet嘅女仔，搞到Janice面都紅晒：「希望下次可以再一齊開騷，其實香港男歌手之中，我係好鍾意Jay把聲，每次同Jay合唱都好開心，唔知點解同佢喺台上面好有默契。」兩人之後合唱《家門》，Jay再話：「因為Janice太sweet，我特別揀咗一首歌獨唱，送俾Janice同大家——《遠在眼前》。」
Janice呢晚繼續以細膩靚聲獻唱多首金曲，自彈自唱《ONLY LOVE》之餘，又同Guddy以及SVA合唱團一齊演出《鐵蘭花》同《所以我愛》，更挑戰Rap。而呢晚盲盒歌曲仲係佢2009年推出首張英文大碟中嘅《Please》。隨後獻唱《一場誤會》時又走到台前同觀眾近距離握手。
到演唱會尾聲，Janice又公開重量級喜訊，宣布將第6次踏上紅館舞台：「有個好開心好開心嘅消息，之後會去我最鍾意嘅城市，返屋企香港開騷，年尾就會喺紅館同大家再見面！」之後Janice以《大哥》為演唱會劃下完美句號。
之後場館開燈後亮起觀眾仍唔肯離場大叫Encore ，Janice被歌迷的熱情感動再次登場：「原本冇㗎喇，不過你哋太熱情喇，仲有咩歌想聽？不如即場點唱。」全場歌迷點出很多歌曲，最終Janice選唱大部分觀眾想聽嘅《雜技》。
雖然呢日開騷撞正生理痛，不過Janice就話：「開騷最怕遇到女人生理不適，不過今次世界巡迴最令我感受到，只要堅持就可以做到，之前去各地都試過水土不服，但我一次又一次克服。另外終於可以宣布返香港開騷，真係好開心好期待，暫時可以透露係香港站唔止歌單會重新調整，整體所有嘢都會係全新！」