方力申 同 何廣沛 作客《J Music》，經已有一段時間冇參與音樂節目嘅小方，大讚節目音樂性好強，令佢唱得好享受，不過當佢跟 布子殷 合唱《十分愛》時，突然有種尷尬感覺，因為首歌係講情侶分手後再相遇，但係佢同布子殷年齡相差太多，聯想唔到同對方曾經係情侶嘅感覺，唯有迴避眼神。
小方經已全方位為演唱會作準備，相信歌迷期待佢嘅歌曲，同時都想見到佢騷肌，小方亦開始嚴控自己嘅飲食，問到太太可會心痛？佢話：「太太話未見過我弗，好期待可以見到，我會盡力。」小方笑言到時會除衫，不過裏面係肌肉衫定真肌肉，到時大家留意。
今次係Matthew首次以歌手身份上《J Music》獻唱劇集插曲，佢話心情緊張，感覺好似第一次入廠拍戲時一樣。Matthew平時有登台同出席活動獻唱經驗，不過面對住幾部攝影機拍住唱，就係第一次，係一次難忘經歷。
《J Music》星期六晚 21:30 翡翠台