王菀之 3月28號晚於澳門舉行嘅演唱會圓滿結束，Ivana以一貫空靈聲線一口氣為5千觀眾送上廿多首歌，令觀眾聽得如痴如醉。仲展現幽默本色讚觀眾話：「原來你哋唱歌咁好聽！我好想有個Choir幾千人一齊唱，不如你哋報名吖！唔啱音唔啱拍子就企後少少，我講真，真係想有個大Choir ！」而全場觀眾仲歡呼一齊應承叫好。
Ivana指歌曲都已唱完時，全場觀眾當然狂叫「Encore！」，Ivana話又公開俾大家點唱，現場隨即陷入沸騰，歌迷不停大叫想聽嘅歌名，Ivana亦不斷滿足大家，先後獻唱《幸福》、《想愛不相愛》、《月亮說》等歌曲。
點唱環節時佢又突然自嘲話：「你估我一個人企係到講嘢好容易？不如唔好我自己一個講啦，請佢上嚟同我講啦！」全場燈光一轉，神秘嘉賓 張敬軒 突然登場，隨即令全場觀眾陷入瘋狂，軒公上台後仲突然將Ivana抱起，然後仲搞笑話：「妳又重咗！」Ivana就回應：「你可能係第一個做到呢個動作嘅男人。」軒公亦回敬：「唔怕，我戴咗腰封，哈哈！」 。
軒公又深情對皇后話：「我成日覺得點解你個舞台好似有個魔力，我好羨慕今晚每一位觀眾，睇菀之嘅騷係一個好療癒嘅晚上。我喺台下準備時都有被你音樂擁抱住嗰個感覺。識你咁多年，都係咁冇變過。你話自己好慌，恭喜你終於知自己係方形啦。」
軒公之後又轉話題：「我想話呢，我幾時可以脫離嘉賓身份，變成同你一齊再開騷呢？我哋對上合體就嚟……十年啦！如果呢個十年唔開，我哋就60歲喇。」Ivana就回應話：「你算唔算而家邀請我呀？」軒公就興奮話：「我哋今晚不如當係一個小小預演吖！」隨後兩人就合唱經典歌曲 《手望》。