今個月28號係 王嘉爾Jackson 嘅32歲生日，由於佢要到墨西哥出席音樂節，所以只好以視像同父母隔空慶祝生日，佢上載咗多張同父母視像嘅截圖到社交平台。疑似喺酒店房同父母作睡前通話嘅Jackson，一改平日清爽乾淨嘅形象，佢赤膊上身滿臉鬍鬚入鏡，盡顯粗獷猛男一面，而王媽媽則依偎住王爸爸，兩人更以手指組成一個心形送畀囝囝，相當溫馨有愛。
對於自己嘅32歲生日，Jackson先喺帖文中感謝帶佢嚟到呢個世界上嘅父母，仲話永遠以做佢哋嘅兒子為榮，同時佢亦感謝所有支持自己嘅人，指自己每年嘅生日願望，都係想令大家為佢而感到驕傲。Jackson指由於自己正身處墨西哥，估計因為時差問題，生日當天佢會喺飛機上，不過佢急不及待想同大家宣布今年嘅新消息，仲話呢啲新變化嘅然係個巨大嘅挑戰，但同時亦希望呢個變化能夠成為一個全新嘅開始。
今次Jackson去墨西哥其實係出席Tecate Pa’l Norte 音樂節，該音樂節為墨西哥及整個拉丁美洲規模最大、最具影響力嘅音樂節之一，而Jackson更係首位獲邀登上呢個音樂節嘅華人歌手。為咗呢次音樂節，Jackson更咗精選咗多首主打作品外，仲與 Kinjaz 精心編舞、燈光同舞台設計，為觀眾帶嚟長達一小時嘅精彩演出。而呢場表演亦呼應Jackson即將展開嘅世界巡迴演唱會，巡演將於北美及拉丁美洲持續進行，多倫多及墨西哥城場次嘅門票已售罄。
