唔經唔覺已經入行唱歌20周年嘅張繼聰，呢日嚟到《StarTalk》宣傳嚟緊將會舉行嘅演唱會，佢仲同TVB娛樂新聞台主播許文軒Edmond 大談自己嘅歌手之路。

講到當年自己出第一首歌，到而家眨吓眼已經二十年，阿聰話感覺就好似仿如隔世，但又好似唔係隔咗好耐咁，佢用漫畫嚟形象化自己嘅歌手生涯，指就好似儲緊一套漫畫咁，唔經唔覺已經儲咗好多本，雖然你已經睇過晒，但當你抽返中間某一本嚟再睇時，又好似好多嘢嗒咁。

阿聰直言感謝成為歌手嘅呢段路，縱然頭幾年主力做歌手時，唔係喺spotlight中間，但自己都有好多好好嘅經歷，有好多好作品、識到好多重要嘅人、遇到好多挑戰，呢啲都係對佢人生起到好大作用。

對於好多Gen Z同Gen Alpha嚟講，佢哋認識嘅張繼聰係一位演員，但其實去年開始阿聰好努力推出咗五首歌，對於而家出歌嘅心態，阿聰話而家係回歸初心純粹享受音樂，冇諗過要打返入咩市場，作為一個獨立歌手，阿聰笑言作嘅歌都唔係好理個市場，亦冇話要得到啲咩。

講到演唱會主題「What’s next」，阿聰指喺而家呢個時勢好多人都會問「下一步跟住係點呢？」，佢話有啲人會以悲觀角度去諗，而自己就以一個興𡚒嘅態度去諗下一步係點。舊年大大細細開咗唔少音樂會，所以今年呢個演出，阿聰直言歌單會大更新，好多舊年唱過嘅歌，都唔會出現喺今年呢個音樂會上，同時今次呢個音樂會就會加上舞蹈大展舞技。

阿聰喺讀演藝時已經開始創作，除咗寫畀自己嘅歌外，至今佢已經寫咗超過70首歌畀陳奕迅、古巨基等歌手，阿聰直言寫歌對佢嚟講冇難度，粗略估計佢所創作嘅Demo已經有成700首，阿聰仲分享咗當年以錄音筆錄歌嘅經歷。