草蜢 最近忙於為下月底舉行嘅紅館演唱會閉關綵排，不過佢哋都好關心Fans，得知大家包場睇演唱會Blu-ray聚會，佢哋就突擊送驚喜同Fans一齊又唱又跳，仲即場向Fans下「打Call密令」同Dress Code，為紅館騷做足準備。
今次演唱會影碟係 蔡一智 同 蔡一傑 花咗好長時間剪輯，阿智指之前喺studio剪片或者屋企睇片都只係一般螢光幕，但今次就唔同，係喺戲院大銀幕呀。佢笑言「你知啦，我哋好少拍電影㗎嘛，能夠上戲院真係一件好開心嘅事 ！」傑少都話睇到自己喺大銀幕上，好好Feel。蘇志威指現場尖叫聲大過戲院音響，厲害。
倒數唔夠一個月，草蜢將再踏紅館舉行全新演唱會，阿智向Fans下「打Call密令」話「今年入場睇紅館騷嘅觀眾，當我哋唱《永遠愛著你》，你哋就拖住隔籬嗰位觀眾，無論識唔識，都拖手和舉起手大合唱，大家記住我哋今年嘅暗號，令成個紅館充滿LOVE ！」傑少預言單身Fans可能「拖出好姻緣」。
蘇老闆就溫馨提示入場觀眾Dress Code「希望大家衣著打扮以紅色、粉紅色『喜慶』色系！」阿智又透露$780票價位置為「寵粉區」，預告有驚喜！至於外傳草蜢每場特別嘉賓名單，蘇老闆大賣關子話「總之佢哋都係重量級！」
