五月天 嘅四場香港演唱會圓滿落幕，適逢3月29號尾場，係五月天用呢個團名出Show嘅29周年紀念日，所以呢一晚對五子同五迷而言都別具意義。一開場，大家已經嗌到好似想將屋頂拆落嚟一樣，五子情緒亦非常興奮。
今次香港站巡唱以生日周做主題，所以喺前三場，五子都用香港特式食物代替蛋糕，同大家一齊唱生日歌慶祝。不過嚟到成團日正日，就梗係有生日蛋糕出現啦！五子向來都認為，五迷就係五月天成員之一，所以喺唱生日歌時，阿信都對五迷講：「今天是我們的生日，祝我們生日快樂。」台下唔少五迷亦紛紛捧起同阿信有關嘅蘿蔔蛋糕公仔等應援物，高叫：「生日快樂！」
五月天早前已經預告即將要閉關投入製作新專輯，演唱會巡迴亦進入尾聲階段，阿信更表示可能要同香港歌迷後年先再見。演唱會以五子搭乘五月天航班降落場地作開場畫面，所以尾場呢晚五子唱《笑忘歌》時，呢架開場先出現嘅「五月天飛機」亦再出現，五子行上機門同大家講再見，大合照畫面非常催淚。 不過五子向來鍾意俾驚喜大家，「機門」關上後，全場齊叫「安可」，五子再度步出機門重覆開場畫面，仲唱出演唱會第一首歌《OAOA(現在就是永遠)》，好似時光倒流咁，令大家非常興奮。
雖然近年五月天備受質疑，認為佢地已經初心不再並且遲遲唔出新碟，呢次嚟香港開Show更是非不絕。面對網上種種批評，阿信喺演唱《憨人》後亦直接表示，好感恩有四位兄弟相伴近三十年，五個人聚埋一齊就會討論音樂以及點帶驚喜俾歌迷，最初嘅五月天係咁，而家嘅五月天都係咁。
對於過激惡評，阿信就以：「管它的，關我屁事。我在我生存的地方，我就是自己的神。唯一影響到我的，就是可愛的你們。」作為回應，更約定歌迷喺未來再見。