兩集累積票房破億嘅《寒戰》系列新作；前傳《寒戰1994》宣佈將於5月1日公映，新片早前舉行盛大發布會，兩代「李文彬」 梁家輝 同 劉俊謙 一同現身，令影迷更期待新作上畫。
《寒戰1994》嘅預告同海報亦正式公開，四大巨頭周潤發、郭富城、梁家輝、古天樂，聯同吳彥祖、劉俊謙、吳慷仁、謝君豪、王丹妮、廖子妤，仲有《權力遊戲》嘅艾頓基倫（Aidan Gillen）以及《唐頓莊園》嘅曉邦納威利（Hugh Bonneville），12大陣容同框列陣，帶領觀眾重返1994年嘅時代漩渦。
預告以雙時空交錯敘事方式引發懸念，由2017年切入，候任特首 葉舜廷 (古天樂 飾)上任前夕，前警務處副處長 李文彬 (梁家輝 飾)意外失蹤。警務處處長劉傑輝 (郭富城 飾)聯同資深大律師簡奧偉 (周潤發 飾)追查真相。預告中，簡奧偉重提金句：「我講過，下半世我咩都唔做，淨係招呼佢一個」，隨即交出一份1994年李文彬絕密檔案。
畫面重回1994年，幾場驚心動魄嘅槍戰同近身肉搏畫面閃現，各方勢力互相試探、暗藏殺機。權力交接嘅真空期吸引外國勢力暗中佈局，艾頓基倫 化身英方重臣，以高高在上姿態拋出一句：「我們不會違反法律，法律是我們編寫的。」
而警隊內部，行動副處長蔡元祺 (吳彥祖 飾)同有組織罪案及三合會調查科署任總警司李文彬(劉俊謙 飾)亦直接交鋒。蔡元祺拋出一句：「有啲嘢做得唔講得，有啲講得唔做得，明唔明？」揭示兩人當年已關係匪淺、互相牽制；李文彬亦反擊指：「你真係以為，香港你揸莊？」
前傳破天荒匯聚逾40位國際、跨世代實力派演員，營造香港影史難得一見龐大陣容。12大要角之外，更閃現多張驚喜面孔。預告片末殿堂級動作巨星 元彪 就以神秘角色現身：「黑和白，從來都是你中有我，我中有你。」一針見血概括戲中橫跨政、商、警、黑四個界別人物嘅角力。
