律政劇《正義女神》於翡翠台播映，當中反串扮演中學生 高成彬 嘅 劉倬昕 ，牽涉入一宗墜樓案，被指係行兇者。而身為港大學霸亦係運動健將嘅阿Sam，就成為觀眾討論話題喇。
阿Sam自幼已係資優生，自細亦已參與唔少田徑運動，後來更成為港隊代表。一向成績優異嘅佢，自傳統名校畢業之後，更入讀香港大學主修語言學、副修教育科同性別研究，更以一級榮譽畢業，正式係文武全才，非常犀利。之後更隨即攻讀犯罪學碩士課程，2024年畢業，唔知佢有冇將所學融入於今次角色當中令事半功倍呢？
其實疫情時阿Sam已參予過《愛．回家之開心速遞》同唔同劇集演出，2021年起又為我哋ENews擔任外景主持工作，同時參與過《搵得去電視城》、《搵鬼同你瞓》、《福祿壽訓練學院》同《我要瞓鬥》 等綜藝節目，佢同 黃瀅仴 仲力克其他隊伍，60個鐘頭唔瞓嬴得冠軍同十萬蚊獎金。
今次加入《正義女神》演出，主角「言官」 佘詩曼 早前拍攝劇集宣傳片時，就特別點名提到阿Sam嘅演出亮眼，希望大家多留意佢嘅表現喇。
《正義女神》星期一至五晚間 20:30 翡翠台