宣明會 將於月底舉辦活動，邀請「暖男爸爸」 黎諾懿 同「細心好媽」 李佳 擔任嘉賓，分享佢哋對於全球飢餓問題嘅觀察，亦向外界傳遞珍惜食物嘅育兒理念。已多次與機構合作嘅諾懿話，希望未來帶同囝囝「小春雞」與「小冬牛」到貧瘠地區探訪，讓生長喺物資充裕環境下嘅佢哋親身體驗飢餓，學會知足。
佢又澄清早前「讀書冇用」嘅言論，強調認為「讀死書冇用」。身處AI時代，佢覺得應該根據小朋友嘅才能發展，而非盲目追求分數或背誦艱深知識，希望孩子身心平衡下成長。踏入馬年嘅佢仲指已有唔少工作，不過大部分時間都會喺馬來西亞拍攝。
而李佳就指去年機緣巧合下，以兒子名義加入助養計劃，旨在培養小朋友責任感，等佢哋明白幫助弱勢群體係公民責任。佳佳指相對丈夫自己對兒子較為嚴謹，曾於疫情隔離時藉由「兩餸飯」教育小朋友珍惜食物。佢認為小朋友應適應好似學校集體午膳等群體生活，而非事事給予特殊照顧。佢又透露即將推出個人新歌，會展現與以往唔同嘅形象。
