李克勤 日前於新加坡舉行兩場演唱會，兩日共吸引逾一萬一千名觀眾捧場。除新加坡當地歌迷外，仲有唔少來自馬來西亞、香港同海外嘅歌迷專誠飛到當地撐場。
克勤嘅演出唱足廿多首經典金曲，由深情情慢歌到快歌，每首都係集體回憶。唱到《紅日》時更全場大合唱，歌聲震撼整個場館，將氣氛推上高峰。事後克勤感性話：「每次聽到大家一齊唱大聲鼓掌喝采，真係覺得自己好幸福。」
而觀眾嘅熱情更令佢先後4次Encore，不過演唱期間就發生了一段小插曲，期間有熱情fans將一個公仔拋上台，但由於台上燈光太強，克勤一時以為有黑影想偷襲自己，錯愕間嚇咗一跳，睇真先知原來係fans心意，令全場同時爆笑。
今次開騷 Gin Lee 亦現身現場合唱《合久必婚》，Gin Lee透露小時候曾喺新加坡讀書：「新加坡係我半個家，多謝克勤老師帶我返屋企。」而 林子祥 同 葉蒨文 亦驚喜現身後台突擊探班，原來兩人下周就於當地開騷，當晚專程撐克勤。
克勤演出之餘亦無忘當地美食，仲搞笑話：「新加坡胡椒蟹、海南雞飯、沙嗲串樣樣都好好食，但為咗保持聲線，肉骨茶要等下次先食喇！」