張敬軒 放咗半年假漸漸復工，呢日現身一個活動時，見佢同之前唔同咗，明顯呈現發福狀態。軒公坦承放假期間因為身心舒暢，胃口大開急速增磅，由過年前65KG激增至80幾KG，簡直係人生高峰，而且仲要肥咗喺啲好難減嘅地方，睇嚟軒公嚟緊要進行地獄式減磅喇。
前陣子軒公喺韓國拍攝新歌MV時發生意外，座駕被倒榻嘅金屬架壓毁，好彩無人受傷，但見到架車Total loss全毁嘅面貎，都真係好得人驚。軒公話佢媽咪就立刻搶功勞，話全靠佢有幫軒公拜神，不過最緊要都係人冇事，呢次真係還得神落。
廖子妤Fish 同 陳蕾Panther 都有現身活動，Fish喺3月31號踏入36歲生日，佢會同男友 盧鎮業 到外地慶生，講到男友可能會生日求婚送上驚喜，Fish就婉拒表示想搵多幾年錢先，暫時未有結婚打算。此外，女團 VIVA 成員 李晞彤 將會單飛發展，成為女團首位出單曲嘅成員。
