高海寧 、 劉穎鏇Tiffany 出席 TVB才駿軒 財富節目頭炮《財富之道》嘅記招，節目即將於4月8號晚八點喺翡翠台首播，並由Tiffany同 陳緼珈 做主持，分別同專業嘅財富管理專家同金融精英暢談財經熱話。
Tiffany最近升呢做老闆，今次仲嘗試著上專業套裝做節目主持，呢個體驗都令佢感到好特別，亦好期待俾大家見到佢專業一面。Tiffany仲話，佢所主持嘅兩集節目都會討論到現今大熱話題，好似A.I投資、利率走勢等等，作為商界新鮮人嘅佢都好關注呢啲資訊。
高Ling一向投資有道，更有「樓后」呢個花名，佢就話自己除咗買樓外，亦有將財富交俾專業團隊打理，自己亦會不斷學習更多投資理財方式。
《財富之道》作為TVB才駿軒財富主題節目頭炮，Tiffany同高Ling期待可以透過節目同新團隊學到更多財富知識之外，亦希望觀眾由簡單易明入手了解財富知識。高Ling早前請咗一個月假去旅行，佢就話自己係拍咗《Grand住享樂人生》後認識咗專業團隊，先有更多嘅財富去旅行，好好享受生活。
