今個星期繼續由王鎮泉為觀眾送上最新電影資訊，嚟緊暑假《蜘蛛俠：英雄重生》就會同大家見面喇，今次嘅反派角色同上一集一樣人多勢眾，暫時已經知道嘅有蠍子人 (Scorpion)、迴力鏢 (Boomerang) 、狼蛛（Tarantul）、墓石（Tombstone）、手合會(The Hand) ，再加埋亦敵亦友嘅 制裁者（Punisher），就咁睇已經令到粉絲超級期待喇。
另外有傳聞話本身仲有一個好關鍵嘅女反派人物想搵Anne Hathaway或者Sarah Snook擔任，可惜兩位都拒絕咗邀約，不過有傳Stranger Things女演員Sadie Sink飾演片中Xmen嘅黑鳳凰Jean Grey就傳到幾乎肯定咗嘅一樣，而且仲話戲份會好重添，相信謎底好快都會揭曉㗎喇。
最近喺《超級瑪利歐銀河大電影》裡面，再次聽到Jack Black為庫巴呢個大魔王配音，原來Jack本身私底下都係一名超級電子遊戲玩家嚟，所以除咗Mario外，佢都有參演過Minecraft同埋Borderlands呢啲知名電子遊戲嘅真人版電影，而最近佢仲公開向《人中之龍》𢯎撈，話如果真係會拍真人版電影一定要搵佢，哪怕佢只係做一個中年美國肥佬都照殺咁話。
本周電影新片速遞：
《超級瑪利歐銀河大電影》前作冒險結束後，瑪利歐同路易吉再度踏上全新旅程，進入浩瀚無垠嘅銀河宇宙。與碧姬公主、奇諾比奧同新夥伴Yoshi一齊探索奇妙星球同宇宙挑戰，面對強大敵人，展開充滿驚喜、友情同勇氣嘅太空冒險，帶嚟更多歡樂同刺激嘅動作場面，等觀眾一一重溫瑪利歐嘅經典魅力！
《教場：驪歌》講述第205屆警察學校學生繼續接受魔鬼教官風間公親毫不留情嘅考驗。隨著學生們不為人知嘅秘密逐漸被風間揭露，部分學生選擇退學。同時，警校內部亦繼續發生好多事件，風間教場嘅畢業生正追查綁架事件嘅蛛絲馬跡，意外發現有人圖謀喺警校畢業禮犯案。
《我們不是什麼》故事係2月14日情人節，一架雙層巴士喺鬧市發生爆炸，造成多人傷亡，鑒於案情嚴重，警隊重聘離職六年嘅前鑑證專家龍Sir協助調查。爆炸案嘅死者當中，有兩具男性遺體無家屬認領，當警察查到其中一名男死者嘅居所時，發現劏房嘅門後寫住：「當雪崩的時候，沒有一片雪花是無辜的。」
本周票房龍虎榜，截至4月1日中午，第1位《狸想奇兵》、第2位《末日聖母號》、第3位《夜王》。
