有美魔女之稱嘅陳煒近日喺熱播劇《正義女神》中，一幕同古天祥嘅激吻床戲睇到觀眾㷫烚烚。劇情講述飾演大狀「高淑樺」嘅煒哥，因受案情困擾而鬱鬱不歡，自然地去咗搵Carlos調劑，一嚟就又攬又咀兼上床，節奏迅速交代，短短嘅時間已經叫觀眾睇得火熱。
煒哥同Carlos激咀時，不單露出白滑香肩，更若隱若現見到佢身上嘅私伙黑色Girdle內衣，盡顯美好身材，為配合劇情，見煒哥毫無忌諱咁咀得好肉緊，兩人瞬間投入激情狀態。
呢幕戲一出街後即成為焦點，人人都大讚52歲嘅煒哥保持得一副好身材，拍出嚟嘅感覺好誘人魅力十足。煒哥曾透露呢場戲好特別，當時總監製鍾澍佳有詢問過佢想搵邊位男演員，煒哥二話不說就諗起相識多年嘅古天祥，因為佢同Carlos曾經拍過一啲情人節Promo有床戲，做生不如做熟，結果效果好好，仲話呢場戲拍咗好多畫面，但剪出街嘅唔多。
煒哥事前有同老公陳國強醫生申報會拍攝呢場激烈戲，幸好工作得到老公體諒，仲講笑話場戲咁短。
