謝霆鋒日前受香港大學邀請，出席一個主題講座，跟大家探討佢橫跨演藝、餐飲、科技、商業等多個領域嘅歷程及創新思考。講座以對談形式進行，跟住設有問答環節，讓霆鋒答現場同學提問。
霆鋒喺講座上透露自己喺不同範疇嘅思考模式十分相似，尤其喺創意方面：「對我嚟講，寫歌嘅第一步係先收集音符；準備一道菜嘅話，就需要先收集食材，然後一步步諗點樣搭配。」霆鋒話第二步就係確定想做啲風格或菜系，「煮嘢食嘅話，你會問自己：『我想做福建菜定係泰菜？定係想做麻辣風味？』音樂方面就係揀邊種類型，你想做 Heavy Metal、Rock 定係 Jazz？呢一步就好似揀定個大方向，之後從中再發揮。成個思維路徑都係一脈相承。」
霆鋒特別提到《推倒重來》呢首歌並有感而發，指現今正處於文化、科技與人性嘅交匯點，AI發展速度指數級增長，幾乎每星期有新突破，令所有事情要「推倒重來」。霆鋒更觀察到就連價值觀都正被挑戰：「以前大人教我哋要努力工作、努力讀書先有美好未來，但而家有人話工作只係其中一個options , 甚至未來可能根本冇工做。咁我哋仲點解要咁努力工作？呢個就係價值觀被重新審視、改變嘅過程。」
霆鋒自爆一個十多年前被視為「黐線」嘅想法，佢曾營運電腦特效公司，經常掃描自己樣貌製作數碼版本。有次掃描時突然靈機一觸，跟經理人Mani講：「十年後想繼續成功經營藝人管理部門，每個藝人都應該好似我咁樣scan自己個樣。」
霆鋒建議掃描唔同年齡階段嘅藝人，例如20到30歲嘅謝霆鋒同容祖兒，然後將數碼形象進行數位授權：「我相信十年後、十五年後，人類已經唔需要再親自出鏡去拍廣告、拍電影。你諗吓，我拍好多動作電影，嗰啲場面連買保險都有困難。如果可以用數碼形象代替，就解決咗好多問題。」霆鋒認為呢個做法同樣適用於運動員，讓佢哋毋須擔心受傷或體能限制。
霆鋒回想十幾年前講呢啲說話嘅時候，所有人覺得佢好黐線，但時至今日大家已經歷NFT、Blockchain等概念洗禮，技術上完全做到。霆鋒認為現在只差一步：「關鍵就係要睇吓邊個願意做嗰隻白老鼠，第一個去嘗試呢個新方向。」言下之意，呢個當年被視為天方夜譚嘅構想，隨時可能成為娛樂圈未來趨勢。霆鋒最後寄語大家要去擁抱、接受同點樣利用AI科技：「其實講到尾最令你嘅難忘、最設身處地嘅嘢，就係要有自己嘅Experience。」