視帝陳山聰演藝經驗豐富，近日接受郭玥彤（Celia K.）訪問大爆撞鬼親身經歷，仲話Jaco係觀音送子，當年同馬德鐘飛西藏拜觀音後，就有咗阿仔Jaco，一返嚟《金宵大廈》就播出。
山聰記得2018年獲贈一尊送子觀音，翌年馬德鐘太太張筱蘭勸佢去西藏參觀布達拉宮、財神廟等，有次山聰同馬德鐘飛去上海睇林峯演唱會，即興決定飛去西藏。山聰喺當地買咗一串佛珠，請每個經過嘅喇嘛加持念經：「直至去到布達拉宮最頂，有個觀音像喺最頂，有個喇嘛將我串佛珠擺咗喺觀音盤坐個位度。」
山聰話當年有咗Jaco，嗰年經典劇《金宵大廈》就播出，山聰話打算今年去西藏還神。Jaco更係從細就唔食牛肉，仲會提醒山聰拜神裝香等。講到山聰去年被爆婚變傳聞，佢認去年有啲唔順利，又有啲是非，整個人都陰沉啲，佢喺機緣巧合下拜咗泰國佛教中嘅拉胡天神，話所有嘢突然轉向，又指自己係除咗阿Bob以外，算係娛樂圈入面幾多嘢做嘅人。山聰又指每次去完紅磡觀音廟拜神，一定有好事發生，佢亦喺馬來西亞見過濟公「上童」，指濟公能將佢心底話講出嚟。
陳山聰分享自己6歲時曾見過師傅回魂，教武術嘅師傅肺癌病逝，師傅出殯後當晚，山聰同父母喺屋企睡覺期間，聽到敲窗聲，「Daddy開咗窗，佢叫：『一哥，你入嚟啦！』」山聰亦跟住起身出咗個廳，見師傅着住套唐裝衫企咗喺度，形容當刻似拍戲咁突然狂風大雨，山聰話當時師傅講咗嘢，但自己因年紀太細忘記咗，由於山聰當師傅如父親，對於多次夢見師傅教打拳，自己都毫不害怕。
山聰透露廿幾歲時運氣麻麻，戴親泰國佛牌都爛，每次入酒店房都會敲門打招呼。 佢記得20多年前同陳法蓉、梁婉靜去印度大半個月拍攝。事前陳山聰帶定泰國佛牌同符咒過去，但去到印度後仍「日日冇覺好瞓，好驚」，一行人轉咗一間標本酒店，酒店牆上掛多個唔同動物標本，一入到去就發現泰國佛牌成個突然唔見咗。
山聰當時用鐵鏈吊住佛牌，對佛牌消失感到不可思議，其後怪事接踵而來，先係水喉冇水，搵人嚟睇就忽然有番，當晚喺房睇電視，吊扇突然開完又熄，山聰上前查看時嚇到大叫：「個掣突然好似有人扭咁『啪！啪！』我大嗌：『鬼呀！』衝出房門口，同一時間，陳法蓉喺另一個門大嗌『鬼呀！』全層樓即停電。我哋乜都冇衝出房，同一時間幾個人衝出嚟。」山聰話當晚最後一行人喺大堂瞓覺。