陳曉東呢日現身廣州一個頒獎典禮，拎埋自己嘅卡通公仔一齊行紅地氈，面對Fans嘅要求通通無托手踭。東東喺典禮上唱出情歌《禁止糾纏》、《心有獨鍾》，冧爆歌迷。
東東嘅紅館個唱即將喺6月舉行，務求帶最好嘅演出俾大家，所以佢呢排積極進行籌備，更透露想Show俾大家睇幾個唔同嘅音樂面貌。至於健身方面，東東就搵咗一個參選過健美小姐嘅女教練訓練自己，因為可以激勵自己，唔可以輸俾女仔。
東東繼1998年一首《水瓶座》後，近日同黃偉文合作再出歌，勾起唔少樂迷回憶。東東大讚Wyman角度新鮮，呢次新歌係講人人都有一種潛能，唔應該被壓力掩蓋，大家應該要放飛自我多啲，再次啟發自己。