視后佘詩曼喺演藝路上成功有目共睹，經過多年嚟嘅磨練，阿佘先有今時今日嘅成就，一直感激身邊扶持過佢嘅人，佢都好體恤新人之路，自己會出心出力提拔後輩。好似阿佘主演《正義女神》，由劇集未出街，佢已經高度讚揚新演員劉倬昕SamLau，劇集出街後，劉倬昕飾演嘅魔童角色高成彬成功突圍跑出，睇到觀眾好嬲之餘，亦大讚佢將角色拿揑得好好，一邊鬧一邊睇，已經係成功嘅一大步。
劇集播映一星期的確好大迴響，見到觀眾有呢個反應，阿佘都好安慰，再次給力加持劉倬昕，喺社交平台出Po話太入戲，雖然每次見到都想打高成彬，但阿佘都想讚吓呢個年青演員劉倬昕虛心學習、不恥下問，好緊張自己每一場戲嘅表現，呢種精神唔單只係新演員，阿佘都不時提醒自己，活到老學到老。
阿佘希望大家欣賞劉倬昕嘅演出，並大大力為高成彬加油！當事人劉倬昕親自回覆：「言官，多謝你幫助我同高成彬成長，無言感激。」唔少網民讚阿佘無私幫助新人，又好羨慕劉倬昕可以擁有阿佘嘅一個Post，亦有人話睇見佢做高成彬個樣都心寒，連阿佘好友周家怡都讚佢真係做得好好，最搞笑係竟然有人覺得劉倬昕同蕭正楠撞樣。
