莊思明（Lisa）與男友楊明自2016年公開戀情至今，二人迎嚟拍拖10年，呢段感情經歷過唔少風浪，思明一直不離不棄，近日佢哋喺社交平台貼出一輯火辣10周年紀念寫真，驟眼睇都幾似婚照。
思明喺社交平台上載多張靚相，見二人放閃chok爆。踏入呢個重要里程碑，思明既感性又真誠感謝男友一直以嚟嘅愛錫、遷就與包容， 「🥰呢十年間我哋兩個經歷過高山低谷，當中有歡笑亦有眼淚，感恩無論發生咩事，我哋仍然有對方喺身邊！我同你都唔係會講肉麻情話嘅人，一切在心中啦🤭 希望我哋以後繼續打打鬧鬧、嘻嘻哈哈、健健康康，繼續做個開心快活人 YEAH 」 。
楊明同思明早前出席活動已透露計劃2026年喺香港舉行婚禮，目前正穩步推進婚事，仲話結婚只搞大型派對同啲親友一齊開心，思明笑指身邊嘅人比佢哋更急，佢覺得目前一齊住同結婚冇乜分別，婚後唔會有好大轉變。
