已故賭王何鴻燊千金 何超盈 嘅6歲囡囡「荷包蛋」辛阡覓（Audrey），日前喺亞洲國際博覽館第十一屆兒童書展上，舉行個人藝術展「Galleria Audrey Rose」，一共展出22幅原創作品。
而展廳中央就擺放咗一幅Audrey以自己舊鞋拼貼成嘅巨型心型畫作，極具創意，盡顯藝術天份。Audrey更榮獲書展頒發「最佳兒童藝術大獎」，媽媽超盈亦親臨現場，見証囡囡嘅成果。
其實年紀小小嘅Audrey，已經參加過唔少畫畫比賽及藝術展覽，更屢獲獎項，作品先後亮相巴黎羅浮宮卡魯塞爾廣場及波士頓美術館，好似去年Audrey就參加咗一個名為「致敬大師國際青少年藝術展」，並喺北京展出「畫出我夢想」嘅作品。
Audrey咁有藝術天份，除咗媽媽悉心栽培之外，相信佢亦遺傳咗超盈極高嘅藝術造詣，超盈2013年畢業於香港大學藝術系，近年更專注藝術及教育領域工作，佢而家亦係香港藝術中心監督團兼香港藝術學院督導委員會成員。
