熱播劇《正義女神》喺香港播映一星期話題不斷，劇中關注青少年犯個案別具意義。一眾演員宣傳時連環公布喜訊，劇集喺內地平台嘅瀏覽量、熱播榜同口碑都成為No.1，點擊亦有破億嘅佳績。
言官 佘詩曼 喺「離島三害案」嘅震撼判詞極具張力，獲觀眾激讚。阿佘表示每場對白都會自己執執，務求變得簡而精，令觀眾更易明白。佢話每晚沖完涼就修改對白同背稿，為第二日拍攝準備，所以喺片場時，演員間都冇乜時間交流。
飾演惡魔少年高成彬嘅 劉倬昕 ，雖然犯案時個樣好得人驚，睇到觀眾心都寒。不過阿Sam表示內地好多觀眾都想挑戰高成彬一角。講到高成彬重返凶案天台奸笑自拍一幕，阿Sam話拍攝時已經係較後段，當時已經入咗高成彬嘅世界，而喺天台時，當佢望住陰天嘅天空，就諗到「蒼海一聲笑」，跟住就做咗仰天奸笑表情。
陳煒 同 古天祥 喺上星期嘅劇情中上演咗幕床戰，煒哥仲出動私伙內衣露出白滑香肩，保養得宜再成熱話。煒哥話自己屋企都準備咗幾套性感內衣，方便隨時用，而事前自己都會着畀老公過目。
蔣祖曼 一改以往形象做個溫婉嘅感化官，出街後反應唔錯，相反飾演律師嘅 馬貫東 就話會吸納網民好壞嘅評語去改進，但一諗起劇中長達6頁紙嘅對白依然記憶猶新。Joman話今次角色做得好舒服，因為似自己咁溫暖、溫柔同真誠。
《正義女神》星期一至五晚 20:30 翡翠台