賴慰玲最近忙住拍新劇《警是個大佬》，早前抽時間陪伴大仔Marat展開沙巴母子旅行。阿賴早前講過大仔自兩年前開始迷上飛機，夢想有朝一日成為機師，原本一家計劃出發去埃及，因杜拜轉機問題及一切唔太穩定因素，無奈取消整個行程，為咗滿足大仔想坐飛機嘅渴望，阿賴決定喺忙拍劇前，陪阿仔上天下海。
阿賴噚日喺社交平台貼出多張跟大仔及好友玩樂嘅相片，見佢同大仔開心準備出發，一齊玩仙女棒、嘆當地美食及體驗激流泛舟等，並寫道：「一個屬於我和他的旅行👩🏻👦🏾上天下海都奉陪到底✈️🛥️🐢🐠🏝️，去不成埃及去沙巴，最美的風景永遠是身邊的人，每個旅行都係未完成的旅行，呢個旅行夠我哋記一世。」
阿賴感謝好友帶佢哋兩母子深入了解沙巴，仲約定下次去沙巴要同好友一齊深潛添！好友蕭正楠留言：「好靚好靚❤️❤️❤️，個海同埋啲榴槤。」阿賴笑問：「見唔到啲相有我？」老友之間互動非常搞笑！
