陳煒 與 佘詩曼 喺熱播劇《正義女神》展開霸氣式「正邪對決」，戲份極具張力，高手過招大鬥演技，阿Sam（劉倬昕）反串扮中學生飾演奸角高成彬成功突圍而出，今集《StarTalk》搵嚟煒哥同總監製 鍾澍佳 接受TVB娛樂新聞台主播 潘盈慧 訪問，講吓對阿Sam演14歲叛逆少年嘅評價！
佳導喺籌備呢套劇時，見過好多17、18歲男演員，覺得男仔呢個年紀睇落好大個，又變咗聲似一個佬咁，完全唔似佳導想像嘅高成彬，佳導後嚟諗起有次喺活動上見過阿Sam做司儀，覺得阿Sam嘅外型同聲線好合適，casting後決定大膽起用新生代演呢個關鍵角色。
阿Sam直言獲演高成彬呢個角色，當時難以置信到愕然有啲眼濕濕，亦好期待有煒哥飾演其母。阿Sam憑奸角高成彬一角令觀眾留意，更被揭擁有學霸背景，港大犯罪學碩士畢業，阿Sam將自己學過嘅理論去研究劇本添！
阿Sam笑指由細到大好鍾意監獄，係一個「監獄癡」，自己又唔想犯法，就走去讀犯罪學。佳導見阿佘同煒哥好有耐心指導阿Sam有關演技竅門，佳導就用心良苦去「折磨」阿Sam，拍法庭場口時唔准其他人同阿Sam傾偈、又唔准畀阿Sam食嘢，要坐埋一邊睇劇本去培養情緒，阿Sam就爆煒哥有偷偷畀嘢食佢，佳導搞笑話煒哥就係咁縱咗高成彬出嚟！煒哥曾聽阿Sam哭訴被佳導「恐嚇」，即化身慈母暖心安慰阿Sam。
《正義女神》星期一至五晚 20:30 翡翠台