TVB熱播劇《正義女神》其中一位法官「洪官」洪思義由已故演員許紹雄飾演，呢部劇集亦係其最後一部作品，唔少網民見到許紹雄演出亦大感不捨，洪官以愛感化天下父母與兒女，更著重教化，日前播出「少女殺嬰案」真相，許紹雄判詞非常觸動人心，女兒許惠菁（Charmaine）讚爸爸做得好好，希望大家喜歡呢個角色！
myTV SUPER睇《正義女神》洪官窩心判詞
該集講飾演少年犯麥珊珊嘅吳文懿，曾被鋼琴老師強行發生關係，一直活喺對方洗腦陰影下，洪官語重心長稱被告嘅BB係一條生命，每一個小朋友成長都係得到家長嘅扶持，並唔代表係大人嘅附屬品，身為父母更唔應該將BB當作工具，用嚟達成自己嘅目的，同埋剝奪佢嘅性命，「咁樣係一個自私嘅行為」， 洪官更寄語作為父母應該要感恩成為仔女人生嘅一部分，但係冇權操縱佢嘅一切，洪官判詞獲唔少網民贊同「小朋友唔係大人嘅附屬品」。
洪官喺劇中同「阿仔」丘梓謙關係跌入冰點，呈現好法官唔代表係好爸爸。事緣洪官兒子廿年前因犯事被判警司警誡，惟洪官有感自己身為法官，兒子行為令佢丟架，忍唔住打咗阿仔一巴，事後洪官惱悔不已，但現實中嘅許紹雄卻係100分好爸爸，對愛女給予無限量支持，打本700萬畀愛女做生意，又邀請圈中好友撐場，又孖愛女一齊拍片做KOL，凡事出心又出力，以行動支持表達滿滿父愛。
許紹雄女兒許惠菁喺社交平台限時動態分享爸爸演洪官獲讚嘅相關內容，並寫道：「係呀，我爸爸真係好好㗎，佢從來冇逼我做我唔想做嘅嘢，反而我想做嘅，佢都全力支持，真係好掛住佢呀！」really wish we had more time, gone too soon but never forgotten love you（真希望我哋能有更多時間，你走得太早了，但我哋永遠唔會忘記你，愛你）！
