影帝 梁朝偉 首部歐洲電影終於上映，偉仔聯同匈牙利導演伊廸高安怡廸現身首映禮，偉仔為咗演好戲中腦神經科學家角色，前期不惜花足半年時間準備，坦言至今亦未能抽離，工作完畢後已經設法投入自我生活，去旅行同滑雪，但現時仍未搣甩睇科學書習慣，仍然活在角色之中。
偉仔活動上一邊派心回饋粉絲，一邊面露尷尬神色話自己流晒汗。而日前偉仔喺韓國宣傳時，配合當地文化做出多款Cute版送心心動作，但憂鬱嘅表情就引發好多話題，又話佢係被迫經營。偉仔呢日就否認指雖然自己係唔習慣呢個舉動，但能夠氹人開心何樂而不為，更透露老婆劉嘉玲已睇過主演嘅新片大讚好睇。
偉仔從影多年大小嘅製作都接觸過，估唔到今次佢會被一場教學戲難到，而且仲要拍足50次，中間偶有忘詞情況發生，笑言面對台下百幾二百學生覺得自己好肉酸。不過偉仔事後有解釋拍咁多次並非自己NG，只係電影唔係大製作，導演需以不同角度反覆拍攝。
