Tyson Yoshi偕王嘉爾合推新歌 預告下半年到寶島開騷

Tyson Yoshi日前出席一個大型活動，除咗爆肌唱情歌，仲演唱一首勾起唔少90後童年回憶嘅動漫歌《Fire!!》令全場氣氛High爆。

Tyson年初開Show邀請咗 王嘉爾 做嘉賓，近日二人合作嘅新歌正式推出，令唔少歌迷都覺得係夢幻聯動，Tyson都好感恩有呢個合作機會，亦多謝Jackson一齊玩。不過被問下一次打算請邊位歌手合作時，Tyson就話唔係純商業角度出發去發出邀請嘅人，多數都係熟咗、Friend咗先會問，抱隨緣性質。Tyson仲預告下半年會做巡演，原定7月喺台灣開唱，但因為場地冇期，所以排期9月舉行。

Tyson唔只鍾意健身，亦好鍾意電單車，最近佢終於考到牌喇！不過因為撞正復活節同清明節假期，賣裝備嘅店舖都冇開舖，所以佢仲未可以揸愛車出行，等假期完結就會即刻入手裝備。