出道25年嘅方力申，為咗宣傳嚟緊嘅紅館個唱，第一次上街頭Busking，好友杜德智更客串鼓手，而劉浩龍亦有到場支持。不過最令小方驚喜嘅，就係突然到場為佢以結他伴奏嘅Joey Tang，小方見到對方現身時，即口窒窒話自己冇budget請對方。
對於演唱會加場，小方就話自己有努力為個唱宣傳，仲話自己到TVB宣傳後，內部飛真係賣多咗，所以佢指勤力宣傳係有用。
自從囡囡Isla出世後，小方就即為「晒女狂爸」，不時會喺社交平台晒出囡囡嘅美照，雖然而家要忙住宣傳個唱，但小方一有時間就會留喺屋企陪愛女，仲話自己最享受為囡囡沖涼嘅時間。小方直認自己太錫Isla，有時會抱住囡囡瞓覺，搞到而家一放低阿女就會喊，不過小方就話小朋友需要安全感，所以自己畀足佢呀。
提到日前喺佛山演出中，與一位極似其舊受鄧麗欣嘅女歌手合唱一事，小方就指對方係該場地嘅註場歌手，當日自己都係第一次同對方合作呀。
