李家鼎前妻施明於3月21日離世，享年76歲。喪禮將於4月22日下午設靈，隨施明病逝，李家父子爆發連串風波，李泳漢 VS 鼎爺、孖生細佬李泳豪隔空對鬧。有指阿哥李泳漢不滿細佬李泳豪嘅台灣太太Agnes，認為弟婦唔尊重媽媽，揚言唔准Agnes入靈堂，更指控豪仔監控鼎爺，並要求分身家等。而豪仔反撃阿哥對媽媽實行監護令，令佢超過一年未能見媽媽。
隨住風波升級，鼎爺終於打破沉默，指控泳漢造謠、更澄清冇被豪仔監控，施明亦從來冇唔鍾意Agnes，婆媳關係唔錯。鼎爺仲話當年豪仔結婚係有邀請施明出席，施明亦計劃出席，但泳漢爆粗恐嚇「你去，我就打X死你」，施明疑驚咗大仔先缺席，鼎爺抱住「家醜不外揚」心態，敢怒不敢言。
鼎爺又指泳漢脾氣暴躁，兩老退讓反而令大仔變本加厲，更行使監護令，令佢同豪仔冇得見施明，因此見唔到施明最後一面，令鼎爺心痛到日日以涙洗面。收到泳漢發出訃聞後，鼎爺表示只想平靜送別前妻，更警告大仔「唔好再屈泳豪」，唔好再生事。泳漢反指自己先係「被屈」，聲稱鼎爺「為咗泳豪個女人抹黑我」，仲話自己有證據證明媽媽唔鍾意Agnes。
喺鼎爺開腔回應前，曾經同佢及豪仔合作過嘅吳家樂就喺自己主持嘅網上節目力撐豪仔：「我認識嘅豪仔，係一個好純品嘅人，好錫爸爸，鼎爺亦好錫呢個仔。」家樂仲話鼎爺對豪仔「錫到燶」，自己平時同鼎爺係直接打電話，唔相信存在「監控」呢個說法。
