陳瀅與蔡潔最近為嚟緊4月喺澳門開嘅限定現場演出《Pillow Talk》密鑼緊鼓排練，日前趁工作空檔應邀上電台受訪分享開Show前嘅心路歷程。陳瀅話仲有兩個星期就要舉行，心情真係幾緊張，皆因唱歌唔係佢嘅擅長，亦未試過喺台上現場演出，絕對係零舞台經驗，仲話嚟做訪問之前，發噩夢見自己揸住枝咪準備喺呢個Show出場，竟然入唔到Key，當時佢喺夢裏面好驚。
蔡潔早前去珠海睇胡定欣一個人撐起兩個鐘嘅Show，一路睇一路學嘢，佢慶幸至少隔籬有陳瀅喺度，兩人一齊做Show嘅好處就係有人傍住，而陳瀅好開心可以同蔡潔一齊經歷台上嘅第一次，如果係同一個有經驗嘅藝人一齊演出，自己會好驚。講到陳瀅喺電視劇《臥底嬌娃》獻唱，陳瀅話嗰啲有得Cut同NG，舞蹈部分又可以重拍，而蔡潔就話Rap同跳舞部份全部交畀陳瀅，蔡潔就喺Drama、負責唱高音位同玩遊戲方面Backup，互相補位。
陳瀅覺得透過今次做Show，跟蔡潔比以前有更加多嘅溝通，目標係希望觀眾覺得個Show好睇，蔡潔話有好多好朋友屆時現身撐場，覺得喺台上面見到觀眾席全部係自己嘅朋友同粉絲，無論做成點，大家都好開心，咁個人都會定啲！