唔少父母喺啱啱過去嘅復活節長假帶小朋友去旅行「放電」，作為星級爸媽嘅楊茜堯、洪永城都唔例外，兩位各自帶小朋友到內地一個主題樂園遊玩，一個就係「高能量超級媽媽」，另一位就係「低精力」爸爸。
茜堯老公羅子溢最近忙於拍攝新劇《警是個大佬》，所以茜堯呢次就要母兼父職「一拖二」，帶囡囡「小珍珠」同細仔出遊。茜堯雖然孭住大背囊，仲要照顧兩個小朋友，喺唔同網民分享嘅偶遇片段當中，可見茜堯全日毫無倦意仲好開心，欣賞劇場表演期間，茜堯更獲邀上台參與互動，仲興奮向喺觀眾席嘅愛女揮手添！
同樣係喺呢個樂園玩嘅Tony就好唔同喇！Tony湊住一對寶貝女，喺社交平台出Post：「在這裏，我找到所有爸爸的一個共通點。」Tony笑指自己已攰到「懷疑人生」，仲影低其他湊小朋友湊到攰嘅爸爸們，令唔少網民覺得好笑之餘，都話「感同身受」。
