汪明荃（阿姐） 與羅家英（家英哥）於2009年結束20年愛情長跑，婚後一直非常恩愛，去年夫妻檔拍攝TVB旅遊節目《帶阿姐看世界》，甜蜜暢遊不丹，家英哥近日接受資深導遊陳成軍網上訪問，罕談與阿姐嘅夫妻關係，坦言兩人拍拖到結婚接近40年，關係喺疫情過後先轉好，彼此了解更多。
阿姐與家英哥當年合演《穆桂英大戰洪州》擦出愛火，家英哥曾多次求婚卻遭阿姐拒絕，直至2019年決定結束廿年愛情長跑，正式註冊成為夫婦，兩人性格看似南轅北轍，家英哥透露阿姐係有啲幽默感，「有啲係冷幽默，不過佢唔鍾意表達」，佢記得疫情期間，二人喺屋企唔出街「日對夜對」，自然會有啲碰撞，當碰撞得多，大家避開嗰種碰撞，就容易啲相處，彼此透過磨合，阿姐亦終於對佢改觀，覺得家英哥係一個好誠實、好誠懇同好鍾意工作嘅人，最後關係融合咗。
家英哥笑言跟阿姐最相似嘅地方就係「泥土味」，二人性格好念舊同對老人家好好，家英哥曾稱「最後等到個汪明荃」係幸運嘅事，感謝太太對佢好，並以「相濡以沫」形容二人關係，直指汪明荃名氣有助佢事業發展，如果娶嘅係普通人，反而會被拖後腿。家英哥又指同阿姐相處雖有吵吵鬧鬧，但更多時候係恩恩愛愛，自己並一味係小男人，其實有強勢一面。
