《25+英皇群星演唱會》舉行在即，音樂製作人王雙駿（Carl）噚日凌晨發聲明宣布將辭任演唱會音樂總監一職，又指喺籌備過程感到非常奇怪，一直未能與各歌手們直接傾談演出內容，每次要經過公司代為傳話，以為所有事情都塵埃落定，陸續歌手們都自己制定歌單搵其他團隊編曲，Carl經過再三考慮，認為完全跟自己所構思嘅音樂取向不同，「為免叨了別人的光」，故此作出此決定，而英皇娛樂亦作出回應！
對於音樂總監王雙駿忽然辭任一事，英皇娛樂表示呢個群星演唱會有別於其他單一歌手嘅演唱會，除咗演出藝人眾多，涉及音樂及製作單位更係多不勝數，相關協調工作複雜度超乎想像，演唱會牽涉環節繁複、分工精細，唔同單位處理其專長領域，為方便訊息準確傳遞，故由主創團隊代表與唔同單位統一協調，以提高溝通效率，佢哋亦由衷感謝Carl呢段日子以嚟為音樂會付出嘅時間同心血。
群星演唱會總監製劉偉強表示：「主創團隊十分感激Carl於演唱會前期提供意見。於籌備期間，Carl帶領其資深團隊為整個演唱會在音樂編排上作專業指導，以及在整體故事構想和音樂配合提供寶貴意見。有關演唱會流程及藝人選歌等已大致落實，籌備工作一直按進度如常進行，Carl雖然請辭，但仍然會擔任謝霆鋒環節的樂隊總指揮，加上其資深團隊仍然繼續留任，故不影響演唱會在音樂上的整體呈現。」 Carl仍然會擔任謝霆鋒環節嘅樂隊總指揮。
今次誠意聯同香港樂壇內極具份量嘅音樂人與藝人為觀眾帶嚟耳目一新嘅表演，是次音樂總監團隊陣容鼎盛，古巨基攜手「最佳音樂拍檔」黃丹儀呈現不一樣舞台經典；陳慧嫻與合作無間嘅音樂人黃兆銘將為其經典金曲注入新元素。陳偉霆（William）亦分秒必爭，喺繁忙工作空檔把握時間與主創團隊進行視像會議。
