《中年好聲音4》今個星期日展開新一輪賽事，由上一round最高分嘅四位選手鄭仲豪、范子睿、尤淑情同吳亦偉擔任隊長，率領親自挑選嘅隊員進行團隊搶分戰。今個星期由范子睿隊對決鄭仲豪隊，每位選手輪流上場為團隊搶分。
越唱越勇嘅莫家淦演唱《Shall We Talk》，更出動埋秘密武器，就係細仔嘅毛公仔，公仔所著嘅衫就係大仔畫嘅。而莫媽媽帶埋一眾好友做應援團為阿仔打氣，令莫家淦都好感動。 好少嘗試Rock歌嘅周志康就以一首《直上》挑戰，阿康就話搖滾最重要係態度，自己嘅血液有搖滾因子，不過收得好埋，佢自爆前一晚緊張到瞓唔到覺。 
兩位隊長呢個回合好有突破，一向行搖滾路線嘅仲豪就揀咗首抒情歌《葡萄成熟時》，子睿就挑戰唱Rap以《饒舌歌》演唱，不過佢話比Rap更加難嘅就係做隊長，仲話自己願意做最下面，最後揀歌都冇問題。 24強位位高手，遇上邊個對手都一樣好頭痛，唯有做好自己，努力為團隊搶分。許美琪就形容子睿係魔王，所以唔想同佢對陣，而家聲同許雲妮係自己好朋友，都唔想對上。 
