鍾嘉欣（Linda）噚日迎嚟42歲生日，佢近日帶埋細女Anika返港，忙於工作兼見朋友敘舊，先後跟楊茜堯及楊思琦等圈中老友開心相聚，勾起一眾劇迷滿滿回憶。
嘉欣喺社交平台貼出多張慶祝生日嘅照片並寫道：「🎂九唔搭八 Birthday Post🎂 隨心而發❤️💭 多謝大家對我嘅生日祝福。 又大一歲啦。 感恩過去一年好好玩。 👯♀️🧸✨🌎 Let the next trip around the sun begin. 😎☀️」嘉欣同思琦妹喺2005年曾一齊於番禺拍攝TVB劇集《人生馬戲團》而成為好友，相中見佢同思琦妹相約一齊享受Contrast Therapy（冷熱交替療法），嘉欣同思琦身穿泳衣，一齊焗桑拿兼泡冷水，非常好姐妹！
楊茜堯曾同嘉欣拍《溏心風暴》系列合作無間，即使各自結婚生子，仍保持密切聯繫，私下感情深厚，今次嘉欣亦抽時間見面，茜堯喺社交平台貼出閨密合照且留言：「So good to finally meet you again after so long. Some friendships just feel like home ❤️ #sisterhood（好耐冇見，終於又見到你，真好！有些友誼好似家一樣咁溫暖❤️ 姐妹情深）」
myTV SUPER重溫《溏心風暴之家好月圓》
嘉欣就撰文感謝茜堯細心照顧，指自己喺演唱會閉關嘅日子，茜堯專登走上嚟帶湯俾佢飲，「有你呢碗湯、有你陪我靜靜哋傾三個鐘頭嘅偈，真係好珍貴。😘 同你一齊，可以冇包袱、做返最真實嘅自己，輕輕鬆鬆，簡簡單單，但係好充實。 短短幾個鐘，已經好似幫我叉滿晒電。 多謝你。 Always support you too」，可見二人喺演藝事業與家庭生活中互相鼓勵支持。
