肥媽（Maria Cordero）丈夫Rick於2017年確診肺腺癌，於2020年病逝，肥媽近日約埋阿妹同妹夫一齊返沙巴度假，佢喺社交平台分享影片曬3600呎豪宅，原來呢棟豪宅係佢同亡夫Rick在生時一同購入，屋內佈置充滿甜蜜回憶。
片中見屋內每件舊物均充滿二人昔日相處點滴，肥媽話當年住清水灣大屋，後嚟搬去大埔單位，啲傢具唔夠位擺，佢直接將啲擺設搬咗去沙巴豪宅，餐桌同櫃擺放嘅位置還原到一模一樣，望到Rick放高爾夫球裝備嘅位置，肥媽若有所思，坦言返到沙巴愛巢，返到老家好有熟悉感覺，整個人好舒服！
肥媽一向熱愛烹飪，丈夫Rick為咗讓老婆方便拎廚具，喺廚房整一個特大嘅不鏽鋼開放式廚櫃，肥媽指佢哋每一間屋都有呢個設計，可見Rick對肥媽嘅細心體貼。
當肥媽望向客廳窗邊角落，亦勾起滿滿回憶，肥媽話老公生前最喜歡喺夜晚坐喺嗰度飲咖啡同抽煙，又鍾愛望出窗外睇日落，欣賞遠方清真寺美景。重臨沙巴愛巢，昔日丈夫Rick身影彷彿仍在眼前，雖然Rick離世近6年，但肥媽愛意從未減退，仲話下次要約埋啲好姊妹再去沙巴揼骨歎吓！
