黃子華、鄭秀文聯同導演吳煒倫等，拉大隊喺街頭請fans食魚蛋，作為電影票房過億嘅慶祝活動，氣氛熱鬧！嚟緊七月Sammi就會喺啟德開Show，佢話好想請戲中一眾兄弟姊妹嚟演唱會舞台玩吓，不過要夾齊人都有難度。
子華早前講笑話要做嘉賓為Sammi載歌載舞，呢日被問時，佢就話希望到時可以到場，因為正有工作安排當中。至於被問如果票房再上升，Sammi會唔會考慮送個唱飛答謝大家？子華就提議佢可以拎兩張飛出嚟，再撕成兩千份分俾觀眾，又話如果過兩億票房，就唔只請大家食魚蛋咁簡單。
子華近年主演嘅幾部電影票房都非常亮眼，令佢可以搣甩「票房毒藥」呢個名。子華亦聽聞有金主買咗佢以前嘅舊作，未知有冇公映或重映計劃。
被問到而家貴為「億神」，揀劇本會唔會感到有難度？子華指自己揀劇本向來冇特別諗法，睇劇本時會當自己睇緊戲，覺得好睇就做；佢仲話自己試過香港票房低谷，但未到達票房天花板，更鼓勵大家應該要有到頂嘅信心，香港嘅票房可以更加高。
早前子華同吳鎮宇、張達明飯聚，三人合體就令大家諗返起當年佢哋一齊做嘅《鬚根show》棟篤笑，更希望佢哋可以做個續集版。呢日子華笑言自己見到飯聚上新聞都嚇一跳，亦冇諗到《鬚根show》咁受歡迎，不過對於三人再開棟篤笑呢樣嘢，佢就覺得大家應該要以身體健康為先，食多幾餐飯再諗。
