一名為唔少香港藝人於內地接洽工作嘅經理人，於社交平台指近年不斷傳出負面新聞嘅 張致恆 將會復出，影片中可見Steven面對鏡頭起舞，狀甚輕鬆。Steven早前先同 馬天佑 合唱新歌，本人未有就「復出」表態。
該經理人又寫道話：「不翻舊賬，不惡意嘲諷。人生沒有完美，知錯就改、腳踏實地謀生養家，已然是成年人最難得的擔當。」
Steven自2019年同 區燕雯（雯雯）奉子成婚後，新聞就一直圍繞住佢哋夫婦同先後出生嘅四名兒子生活嘅「財務危機」同「離婚羅生門」，更因雯雯多次於網上聲稱要離婚而被網民戲稱為「離婚KOL」。
早前七仙羽師傅指曾接濟Steven一家達6位數字，而Steven亦於網上回應，指非常感謝七師傅幫助，以及每一位曾伸出援手嘅朋友。
佢當時寫道：「我只能夠講對唔住，而家嘅我仲未有本事還到錢， 但係我從來冇忘記過每一個人嘅恩惠，亦都從來冇諗過唔還錢，七師傅係一個好好嘅人、好有善心，成日都會主動問我哋過成點，都會問我嘅小朋友有冇飯食，間唔中仲會買啲零食畀佢哋。其實我係(喺)豐澤已經做咗差唔多一年嘅時間，呢一年裏面我都好努力去做嘢， 好多人問我點解唔去攞綜援申請公屋，其實公屋呢就已經申請咗一段時間， 但係呢個世界唔係話人多就可以快啲攞到屋，同埋我真係唔想去攞綜援，因為我好鍾意工作我好鍾意做嘢。同埋我想提醒一下我係有四個仔，大嗰啲唔飲奶粉唔代表細嗰個唔飲奶粉，再加上我哋唔係飲貴奶粉只係美素佳兒3號， 最細嗰個未戒到尿片， 其實有好多嘢我懶得解釋， 要唔信你嘅人永遠都唔會信你。」
