金馬影帝 張震 聯同導演賴聲川等人出席一個舞台劇講座。呢次係舞台劇第三度公演，更係張震相隔5年，第二次飾演同一個角色，呢個體驗都令佢覺得難忘同難得。
張震話當初接演時，以為演10場就可以結束，估唔到至今已經演咗70幾場，隔咗5年即將第3次演出，令佢覺得又攰又過癮，因為每次都有新想法擺落角色度，令自己做得更唔一樣。
張震入行多年，曾留下唔少經典角色，被問到有冇出現過遺憾時，佢就表示，如果要講遺憾係會講唔完，因為每次表演都唔會百分百完美，過多幾年有更多生活歴練時再睇返就會覺得可以再多一啲嘢。
張震仲話老婆曾經講過：「如果表演都是完美，你們就很無聊了啊。」令佢唔會諗返以前，剩係會諗點先做到開心滿意。