謝霆鋒 嘅巡迴演唱會11號晚喺武漢舉行，可惜天公不造美，露天場館遇上突如其來嘅傾盆大雨，不過全場歌迷都冇人離場，著住雨褸同台上淋雨嘅霆鋒大合唱，連 章子怡 都低調撐場，足見霆鋒嘅魅力。
由於之前廣州站遇過大雨情況，所以主辦方今次一早做足準備，確保舞台結構同電力系統喺大雨中都可以安全運作。霆鋒喺大雨中開騷，全程無中斷、開全咪，仲幽默自嘲「我是謝霆鋒，不是謝停雨」，全場三萬歌迷喺雨中同霆鋒大合唱《因為愛所以愛》、《黃種人》、《活著VIVA》等經典歌，加上藍色螢光棒形成嘅一片藍海，場面震撼。
正於武漢拍攝新戲嘅章子怡頭戴cap帽一身casual打扮現身演唱會包廂，不時隨著音樂扭動身體，睇落非常投入，被歌迷認出後亦大方揮手微笑，表現親民，唔少到場嘅歌迷都話好開心睇演唱會仲可以見到另一位大明星，直頭賺咗喇！
