陳凱琳日前參與內地綜藝節目，成為本季唯一香港代表，佢喺「浪姐7」初舞台登場，獻唱美國歌手Meghan Trainor輕快英文歌《Me Too》，雖然贏盡口碑，被內地網民封為「迪麗熱巴接班人」，卻喺評分環節時慘敗，盛傳其亮相節目僅收28萬人民幣酬勞。
陳凱琳聯同李心潔、謝楠、徐潔兒喺新一輪演出，合唱楊丞琳歌曲《雨愛》，該組表演獲得878分算係好高分，但陳凱琳憑洗腦式獨特唱腔引起網民熱議，影片見陳凱琳全情投入，唱到七情上面，激情演繹時更閉眼皺眉，被網民嫌棄咬字及尾音唱腔似「老一輩的唱腔」，又指佢「Overact （演得過火）」似生仔陣痛。
有網民形容陳凱琳抽搐唱腔好有記憶點，留言表示「救命！我聽完佢呢版之後，我好似唱唔返原本嗰個tone；另有網民為抱不平陳凱琳，唔覺得佢走音，稱其咬字唔正，又要迎合內地啲口音同唱法，最後先搞到一嚿嚿。
陳凱琳喺社交平台貼出參賽照片並有感而發，指自己心情好緊張，同埋團隊裡嘅每個人都好強勁，佢只練習咗一個禮拜，曾擔心自己無法達到同樣嘅水平，更懷疑自己可唔可以咬字清楚，最終克服恐懼，體驗走出舒適圈嘅感覺，再次感謝所有一直支持佢嘅朋友們，「希望我的表現夠好，能讓你們感到驕傲！你們知道嗎？ 我也為自己感到驕傲🥰」！
