影帝 梁朝偉 近期忙於宣傳新戲，先係去到首爾同韓國影帝李政宰相見歡，近日偉仔就飛到台灣繼續宣傳，而太太劉嘉玲一路相伴，兩公婆落機時十指緊扣表現親民，睇上去心情非常好。
偉仔晚上同電影嘅匈牙利女導演現身金馬奇幻影展大師班，同大家分享從影超過40年嘅心路歷程。而佢喺大師班除咗同大家分享從影心得，亦親自解答咗關於「睇戲會買六張飛」嘅江湖傳聞！偉仔就話，因為怕被人認出，大家掛住望佢而唔睇戲，所以佢會一口氣買六個位。
大師班由兩屆金馬獎得主劉冠廷主持，對住三屆金馬影帝偉仔，冠廷話自己好緊張，連問題都唔識問，好在偉仔親和力十足，同冠廷開心合照時，仲拍拍對方膊頭，而大師班結束後，佢仲特登留多幾分鐘，為在場等候嘅粉絲簽名。
偉仔星期二就同導演出席新戲記者會，嘉玲繼續陪伴在側，已一段時間冇到台灣嘅偉仔，見到久違嘅粉絲全程保持靦腆笑容，亦表示呢次到寶島宣傳令佢好開心，因為已經好耐冇同台灣影迷見面，呢次終於有新片，而且仲要係自己鍾意又拍得好開心嘅電影。偉仔仲話，自己遇到當年出唱片時期就追隨嘅粉絲，大家都冇乜變。偉仔仲話，好掛住台灣滷肉飯同豬手飯。
戲中偉仔飾演一個神經科學家，為咗投入角色，偉仔事前都做咗唔少功課，唔只要睇好多相關書籍，仲要去唔同大學搵真正嘅神經科學家，真係好認真。