胡渭康、劉洋、黃建東、杜小喬及著名粵劇演員梁兆明等為即將上演古裝音樂劇宣傳，幾位即席獻唱預演實力，小喬又即場耍劍似模似樣。
唱歌對劉洋應該毫無難度，今次佢反而係被廣東話考起，大家仲對佢定下規句，講一隻普通話字就罰一元，劉洋笑言預咗一萬元做罰款，仲話自己做完呢個音樂劇廣東話必定大躍進，但一口唔標準嘅發音就聽到身邊嘅黃建東同胡渭康一頭霧水。
音樂劇背景講述宮廷發生嘅故事，胡渭康飾演一國之君皇帝，同劉洋會孖住有好多對手戲，而黃建東則咩場景都會出現八八卦卦，被胡渭康取笑係「搭訕王」。
小喬與眾多份量級前輩合作獲益良多，尤其在台上嘅互動反應令佢大開眼界，編劇杜詠心特別為劇本注入現代元素，而梁兆明要由唱粵劇轉戰時代曲，對佢嚟講係一個好大挑戰，謙稱要重新學習唱功。
